الجمعة، 11 أكتوبر 2013

سمكة البطاطا (مشاركة) عضو الصفحة باسم السيد

سمكة البطاطا


وهي من اسماك البحر الاحمر والخليج وعبرت للبحر المتوسط من قناة السويس زمان .


موسم البطاطا:
من اول يوليو الى اخر اغسطس بس حاليآ موجوده طول السنة.

موسم التفريخ:
بيكون في بداية ابريل وهي سمكة نهارية يعني مش موجوده بالليل .

الطعام المفضل:
اولا : العجين.
ثانيا : الجمبري (البرغوت) .
ثالثا : الخضرة الشعر (النسيله ) .

طريقة الصيد:
صيد البطاطا يكون بالبوصة اليد مش الماكينة
فيه اكثر من طريقة لصيد البطاطا بالبوصة

اولا بالفلة او الغماز:
الشعر الاساسي يكون نمرة 25 , والارمه بشعر 20 او 18 ومعروف عن البطاطا انها سمكة قوية وخصوصا الاحجام الكبيرة .
السلاح او السنارة نوعين
اما السنارة العادية وتكون نمرة 10 او 11 او 12
او الشلاليط وهي سلاح من 3 سنانير ملحومين في بعض زي الهلب , المهم الارمه تكون قصيرة يعني بالكتير 20 سم , الفلة صغيرة والرصاص او التقل خفيف
العيار (ارتفاع الفلة عن الرصاص ) يكون حوالي ثلثين ارتفاع المية عن الارض
مع الوقت وخبرتك في المكان حتعرف المية عمقها قد ايه
حط العجينة وارمي
اول ما الفلة تغمز نص غمزة الطشها وادعيلي

ثانيا الصيد من غير فلة (حساس)
وهو نوعين
طريقة اسمها الربع او المشنقة
وهي طريقة مش كل الناس بتقبل عليها لانها متعبة شوية
الشعر زي ما اتفقنا 25 , طول الشعر حوالي ثلثين عمق المية , يعني لو بترمي على قرار 3 متر يكون طول الشعر 2 متر , ويفضل استخدام بوصة قصيرة نوعا يعني 4 او 5 متر , السلاح مكون من 6 او 7 سنانير , كلهم نفس الطول اللي هو حوالي 5 سم تحت الرصاصة , ما عدا 2 منهم بيكون طولهم 10 سم , حجم السنانير يكون كبير مثلا نمرة 7 او 6 , الرصاص شريط وثقيل يعني لف ثلاث او اربع لفات كده , حط العجينة الناشفه على الرصاصة ونزلها المية حتلاقي السمك بتشدك ,الطريقة دي بنستخدمها للبوري برضة

الطريقة الثانية في الحساس هي السبحة
وسموها السبحة لان عدد السنانير بيكون كتير وفوق بعض زي شكل السبحة , ودي بيكون فيها طول الشعر زي طول البوصة , نحط رصاصة بلحة نمرة 1 في اخر الشعر من تحت , وفوق الرصاصة نربط من 4 ل 8 سنارة , الفروع طولها حوالي 10 سم , حط عجينة او جمبري ونزلها المية , حتلاقي السمك بتشدك برضه .
و احذروا من شوكه البطاطا مؤلمه جدا يعنى حاول تمسكها بقطعة قماش
دلوقتي نيجي لافضل اماكن تلاقي فيها البطاطا
حتلاقيها في البحر في اي مكان بس فيه اماكن مشهورة بالاسكندرية بالاحجام الكبيرة
السلسلة – كليوباترا – سيدي جابر – لسان جليم الثاني – سان ستيفانو – امام المحروسة – المنتزة – مارينا – جزيرة نيلسون
(منقول من صفحة أعماق البحار)  
   

ليست هناك تعليقات:

إرسال تعليق

المشاركات الشائعة

أرشيف المدونة الإلكترونية