احلى اكلات السمك......

احلى اكلات السمك......

عملت التتبيلة اللي هي عبارة عن : فلفل أخضر + توم + ملح + كمون + شطة + توم بودرة
و حطيتهم في الكبة
و ضربتهم كويس و بعدين حطيت عليهم ليمون و كان عندي شطيطة حمرا أنا كنت عاملاها
و بعدين بأة شكلها كدة جاهزة لتتبيل السمك
السمك عندي كان فيليه و سمك موسى و سمك تاني إسمه سلطان إبراهيم
مسكت الفيليه قطعته وبأة على 3 قطع تقريبا كل شريحة بالشكل دة



و السمك تبلته كويس كدة


و نفس التتبيلة تبلت بيها الجمبري

غطيت السمك بنايلون و شيلته في التلاجة حوالي 4 ساعات و جهزته إزاي للطبخ
الجمبري حطيته في حلة و قطعت عليه 3 بصلات شرايح و فصوص توم شرايح و قرن فلفل حامي و شرايح ليمونو لخبطهم مع بعض و بعدين حطيته ع النار و كل شوية و هو متغطي أمسك الحلة بفوطة من الناحيتين و أفضل ألف فيها عشان أحركه و يستوي كله و أرجعه ع النار و مش بياخد وقت أساسا ودة شكله بعد ما أستوى


و دة السمك بعد القلي و طبعا الفيليه قليته بالبيض و البقسماط



نيجي بأة لشوربة السي فود

حطيت حتة زبدة ع النار مع شوية زيت درة صغيرين

و نزلت عليهم بالبصل أشوحه شوية بس ع الخيف يا دوب حيلون كدة أقوم نازلة عليه بفواكه البحر أشوح فيهم و أحط جزء من تتبيلة السمك كمان عشان النكهة



و أقلب لغاية ما المية تنشف أحط مية و أحط معاها حبهان و مستكة وورق لورا و مكعب ماجي سنة فلفل أسود و كان عندي علبة مشروم حطيتها و أسيبهم يستووا و بعدين أجيب كوباية لبن فيها 3 معالق صغيرين دقيق و علبتين قشطة صعيرين و أقلب بسرعة و قبل ما أقفل عليها أحط بقدونس و كرفس و جزر مبشور و بتغرف بالشكل دة 

نيجي بأة لطاجن السبيط

أقطع بصل حلقات كبيرة شوية و أحمرها في الزيت بالشكل دة



يتحمروا شوية و أحط عليهم جزء من تتبيلة سمك الآولانية فاكرينها

و بعدين أحط طماطم مضروبة في الخلاط


أسيبها تتسبك شوية و أحط عليها السبيط اللي اساسا كان متبل في التلاجة



و أسيبه يتسبك مع بعض كويس جداااا و بعيدن أزود شوية مية صغيرين كدة و أظبط الملح و كل حاجة و قبل ما أقفل عليه مباشرة أحط عليه الخضرة اللي هي شبت و كزبرة خضرا و كرفس



و بعدين أفضيه في طاجن و ع الفرن على طول و مش حياخد وقت يا دوب ياخد وش بس لأن كل مكوناته مستوي و بيكون كدة لما يخرج من الفرن

عملت بتنجان بالصلصة
قليت البتنجان و الفلفل الأخضر و البتنجان طبعا كنت رشة عليه رشة دقيق خفييييفة و ملح عشان مش يشرب زيت و يقرمش



حمرت توم مفروم و طفيته بالخل و بعدين حطيت عليهم طماطم مضروبة في الخلاط


و بعدين أرصص البتنجان في طبق و أنزل عليه بالتسبيكة



الرز بالبصل
عملته عادي زي ما بتعملوه بالظبط بس حطيت في تحمير البصل خلطة المكبوس هي جاهزة عندي حطيتها بس عشان تدي طعم مميز للرز و حطيت مكعب ماجي
و كملت تسويته عادي جدااا و دة شكله



و عملت سلطة خضرا بلدي و سلطة بابا غنوج و طبق طرشي مشكل




رب أكون فيدتكم في أي حاجة و لو بسيطة