الأحد، 27 أبريل، 2014

الصيد في ترعة السلام ( الأدوات المطلوبه_الأماكن المفضله)



الصيد في ترعة السلام ( الأدوات المطلوبه_الأماكن المفضله)



وهي عبارة عن يومين بليلة أو أكثر كيفما يتثني لك الوقت أن تقعد أكثر من ذلك فهو لمصلحتك أولا و أخيرا .لماذا كل هذا الوقت ؟
المسافة بين ترعة السلام و القاهرة حوالي 200كيلو أي أن المسافة التي ستقطعها في الذهاب و العودة حوالي 400كيلو ( مسافة كبيرة تحتاج للراحة في منتصفها ) .
وأيضا أوقات دخول الأسماك الكبيرة فيها علي كذا مرحلة وهي الساعة 6 مساء و الساعة 12 صباحا و الساعة 4 فجرا فهذة الأوقات تكون مستعد فعلا للصيد و ليس إنك لسة هتستعد للصيد .
الأدوات المطلوبة للرحلة
1- سخان ____ لعمل الشاي و خلافة و كذا لتجهيز الطعام لك و من معك .
2- بطانية _____ للنوم عليها ؟أو أن تتغطي بها في حالة البرد .
3-الطعام الذي يكفيك طوال المدة التي ستقوم بالجلوس فيها لإنة هناك لن تستطيع شراء أي شيء لعدم وجود أي مكان تستطيع الشراء منة إلا في البلد و هي تبعد عن الترعة حوالي 50 كيلو .
4- شوال خيش نظيف علشان لما ربنا يرزقك بخير تضعة فية لو أكبر من الأيس بوكي إلي معاك .
5- أيس بوكس و ثلج و مياة تكفيك حسب المدة التي ستقيم بها هناك .
6-طارد للناموس ( وهو متوفر بكثرة )
7- جركن تقوم بتخريمة لوضع شر البلطي ليبقي حي
8- ملقاف
أدوات الصيد
أولا : بالنسبة للسنون :
سن 6 و سن 8 وذلك للبلطي و البياض الأقرع و القراقير و أبو ريالة و القرموط الصغير . ولو في الشتاء للثعابين .
سن 03 و سن 04 للملك ( القشر بياض ) ويستخدم في هذة الحالة الطعم الحي فقط القشر بياض لا يدخل علي أي شيء إلا الطعم الحي و يكون الطعم بصحة جيدة جدا فتقوم بإختيار الشراية الصغيرة و تلاقيها بتتنطط في جركن المياة وليست تعبانة . ومن الممكن أن يدخل علي الطعم الحي هناك ( القرموط - البياض الأقرع )
ثانيا : الخيوط :
خيط 30 خيط 40 و النوعين دول للبلطي أو بمعني تاني للحاجات الصغيرة خيط 60 خيط 70 و النوعين دول للقشر بياض وللشغل علي الثقيل وفي هذة الحالة لا يحبذ عمل أي نوع من أنواع الخيات في الخيط . في هذة الحالة السن في الخيط مباشرة .
الحالة الوحيدة التي يسمح فيها بالتجاوز أن تقوم بوضع واير علي الخيط ويكون الواير 60 أو 40 (نادر الوجود ) أقصي مقاس للواير 80 و أن يكون السن بحلقة .
ثالثا : الطعم المستخدم للصيد :
1- الدوود 2-البرغوت (جمبري صغير ) 3-مصارين الفراخ - حمام 4-الريم 5-الطعم الحي 6- الغلة
أوقــــــــــات الـــــصـيـــد
الصيد في ترعة السلام ينقسم لعدة مراحل و بيانها كلأتي :
1- صيد التجهيز :
وهو في الفترة الأولي من أول الوصول و حتي الساعة الخامسة عصرا ونقوم فيها بصيد الشر بلطي ووضعة في جركن المياة المخرم مثلما ذكرت سابقا . ولا تصلح العياشة لسبب بسيط لإنك لو ربنا كرمك بشر كتير وهو في العياشة عمر الشراية بيبقي صغير .
و أول ما سمكة تموت داخل الجركن أو حتي بالعياشة يجب عليك فورا رفعها . وفي هذة الفترة من الممكن أن يدخل عليك مقاسات كويسة فلا تضعها في الجركن ضعها مباشرة في الأيس بوكس.
2- صيد الملك ( القشر بياض )
بالنسبة لسمك القشر بياض في تـرعـه الـسـلام و الطريقة التى يتم الصيد بها هناك أولا خيط 60 أو 70 على سن 02 إثنين دقن و على غماز مناسب و رصاصة تحافظ علي ثبات الطعم في المياة أما الطعم فهو سمكة صاحية صغيرة أو كما تطلقون علية شر بلطي إذا وقفت فوق السلك هناك خلى بالك إن السمكة الطعم ماتنزلش فى السلك علشان ماتوعرش و تخسر الوش .
و خلي بالك إن العصفورة بتاعت الماكينة تكون مفتوحة مش مقفولة لإنة لو حس بالخيط قبل ما يبلع السمكة هيتفها و تزعل انت . فالمطلوب من حضرتك عدد من الأشياء مهم جدا ان تعملها وهى كالأتى :
1-ترك العصفورة بتاعة الماكينة مفتوحة .
2- أنت الذى يحدد الرمال طولة قد إية حسب المكان إلى هتصطاد فية على ترعة السلام علشان السمكة الصغيرة ما تدخلش فى السلك و توعر .
3- عندما تلاحظ إختفاء الغماز سيبة فترة من غير ما تعمل اي حاجة وهذة الفترة حوالى من 30 ل 60 ثانية لا تلمس الفبرة بعد كدة إقفل شوية على العصفورة وإضرب علي السمكة و على طول لو حسيت بشد إفتح البيك أب بتاع الماكينة وسيبة يسحب زى ما هو عايز وبعد كدة إقفل البيك أب وتعامل مع السمكة لا تشد علي طول و لا ترخى على طول , شد و إرخي لحد ما الخير يوصل لحد عندك .
4- يكون معاك ملقاف كويس و يكون في حد معاك علشان ينزل بالملقاف في المياة قبل ما السمكة توصل للبر ويرقد الملقاف فى المياة و لا يتحرك عندما يري السمكة , و عليك إنت إحضار السمكة للملقاف و ليس هو الذي يذهب بالملقاف إلى السمكة لإنة لو عمل كدة السمكة هاتفزع وتجري ولو حصل كدة إفتح البيك أب بسرعة و متشدش علية و إبداء تاني مرحلة الشد و الجذب حسب قوة السمكة إلي معاك . و الى معاة الملقاف علية فقط رفع السمكة من المياة لا أكثر و لاأقل .
5- فرضا إن السمكة أكبر من فتحة الملقاف تعمل إية ؟ يكون معاك قطعة قماش خشنة علشان الأخ إلى معاك يلفها على إيدة و ينزل يضع يدة فى بق السمكة (القشر بياض بقة واسع لا تقلق) و يشد لإن السمكة هتقفل بقها على اليد إلي داخلة بقها .
6- نصيحة هامة ضع جرس على اللبلوب بتاع الفبرة علشان يسمعك الحركة الحاصلة مع السنارة.
7-أوقات السمكة دى تفزع برة المياة لو عملت كدة في أي وقت إفتح البيك أب بسرعة علشان ماتنزلش علي الشعر و تقطعة . 8- خلي بالك هذة السمكة لها أسنان صغيرة في فكيها فهي طول ما إنت عمال تشدها هي بتهرش الخيط .فلازم يكون الخيط جديد و كويس مش مهروش قبل كدة . 9- الماكينة الى معاك لازم يكون عليها خيط كافي أنا عن نفسي بخلى حوالي 100 متر على الماكينة .
10-بعد لما الخير يخرج من المياة إقطع حوالي 2 متر من الخيط ورمل تانى و إنزل بسن جديد .
11 - أوقات بيدخل عليك قراميط وسمك بياض علي السمكة الصاحية الطعم . كلة خير
الأماكن المحبذة للصيد في ترعة السلام
1- قنطرة الحجز
2- محطة رفع السلام 4
3-كوبري 10
4-محطة رفع السلام 5
5- السحارة
6- جميع التفريعات من الترعة الرئيسية
( ملحوظة ) لا يوجد في تلك التفريعات القشر بياض الطريق إلي ترعة السلام تأخذ طريق الإسماعيلية الصحراوي ثم تتجاوز الإسماعيلية و تتوجة إلي طريق بورسعيد ومن هذا الطريق توجد العلامات الإرشادية إلي كوبري السلام وبعد نزولك من علي الكوبري توجد أيضا علامات إرشادية لمنطقة إسمه بالوظة أو سهل الطينة ومنها إلي ترعة السلام ولها الكثير من التفريعات التى تخرج منها .
. أرجو من الله أن أكون أوصلت لحضرتك معلومة كويسة وسهلة
وفي النهاية أرجو أن أكون قد قمت بالشرح الوافي للمكان و طرق الصيد في ترعة السلام و أنواع الأسماك المتوقعة منها و أرجو من الجميع لو نسيت حاجة سامحوني.
-----------

المشاركات الشائعة

أرشيف المدونة الإلكترونية