اماكن تواجد الدنيس :..........

***********الدنيــــــــــــــــــــــــس ************

1-اماكن تواجد الدنيس :
سمك الدنيس بيحب الوعر (الصخور ) وبيعيش حواليه في مجموعات ,وبيحب برضه الارض الخشنة , يعني لو المكان اللي بترمي فيه مفيش فيه وعر ورملته خشنة (حصى) حتلاقي الدنيس موجود وزي ما قلنا انه بيعيش في مجموعات ودايما بيتحرك في المنطقة في شكل دواير علشان يدور على الاكل ولو اخذت منه واحده وغاب عليك بعد كده متقلقش حيلف ويجيلك تاني ان شاء الله .

2-الأدوات اللازمة لصيد الدنيس :
ماكينة او بوصة يد الشعر من رقم40 الى 45 والسنار من رقم 3 الى رقم 6 رصاص متوسط

3-طريقة الربط :ـ بما ان الدنيس موجود فى قاع البحر يربط السنار اسفل الرصاصة وتكون الرصاصة دائما حرة

4-الطعم فى الصيف :ـ
النطاط ـ الجلاجلة ـ الجراية ـ سرطان البحر الصيفى- الدود الاسمعلاوى للدنيس الموجود على الصخور والطعم الطازج الجامد عامة حرصاَ من تدخل السمك الرفيع

5-الطعم فى الشتاء :ـ
جمبرى العقر او البلنص ـ الجندفلى ـ الديدان ـ شرائح السردينيلا

6-طريقة الرمى والصيد :ـ
الرمى فى أماكن الوعر ، وعندما تأكل السمكة لاتشد الشعر وأنما أعطيها بوش من الشعر حتى ياخد الامان و يبلع الطعم كى لاتشلح وتترك السنارة واذا كانت السمكة كبيرة لاتتعجل فى اخراجها حتى ترهقها وتخرجها بالهدوء حرصا على سلامة البوصة والشعر والسمكة ويستحسن ان ترمى فى نفس المكان ولما تلاقى مقاومة من السمكة وقف ايدك شوية لغاية ما يبتدي يعافر وبعدين ابداء فى لم الشعر مرة اخرى .
و فيه طريقتين
أ- بالبوصة الماكينة
الشعر الاساسي 40 –الارمه 35 او 30
السلاح(السنارة) لو فيه فليجس في البحر يبقى السلاح نمرة 5 او 4 او 3 بالكتير , ويفضل سنارة بكرش ,ولو بترمي على السمك الكبير يبقى السلاح نمرة 1 او 2 او 3 .
1- ان تكون الارمة مشابهة للارمة على بوصة اليد ولكن اقصر (مثلا 30 سم و45 سم)وتكون تحت الرصاصة .
2-ان يكون السلاحين فوق الرصاصة ولكن على طريقة السبحة بمعنى ان يكون السلاح الاول فوق الرصاصة ويليه السلاح الثانى واطوال الاسلحة ايضا من 25 الى 35 سم
طريقة الربط :ـ بما ان الدنيس موجود فى قاع البحر يربط السنار اسفل الرصاصة وتكون الرصاصة دائما حرة
ب- البوصة العادية (بوصة اليد)
وفيها طريقتين :-
أ – الحساس
وهو نفس الصيد بالماكينة بس بالبوصة العادية
ب -الصيد بالفلة وده لازم يكون على عمق , لان الدنيس دايما فى القاع
وبتعمل الشعر الاساسي 35
والارمه 30 او 25
السلاح لا يقل عن نمرة 6
والفروع بتعمل فرع متر وربع والتاني متر

من اصعب انواع الصيد البوري عادة بنصطاده بالبوصة العادية وده بيكون بطريقتين

*********طرق صيد البوري**********

من اصعب انواع الصيد

البوري عادة بنصطاده بالبوصة العادية وده بيكون بطريقتين
1- الصيد بالفلة

البورى من الاسماك الحساسة جدا علشان كده لازم نختار وقت الصيد وعدة الصيد المناسبة صيد البوري يكون بهدوء شديد ولو بتصطاد بالنهار لازم تختار مكان لا ينعكس الظل المترتب عن خيالك على المية يعني لا تجعل الشمس في ضهرك علشان ظلك مايجيش على المية وعلشان كده انسب وقت لصيد البوري بيكون من بعد المغرب لغاية الفجر .
الشعر الاساسي مش اكتر من 25
شعر الفروع من 15 ل 20
السلاح 25 ل 20
صيد البوري بالفلة يكون طعمك عجينة ومش اي عجينة لازم تكون طرية .
بالنسبة لشعر الفروع بيكون قصير يعني فرع 25 سم والتاني 15 او 20 سم
العمق اللي بتصطاد علية يكون نص عمق المية
اطعم العجينة وارمي خطاء يرتكبة جميع الصيدين احنا قلنا ان البوري حساس جدا لاي حركة غريبه لو انت رميت زي ما بترمي يبقى مش حتلاقي ولاسمكة بورى في المية يبقى احنا لازم ننزل الفلة بالراحة في المية و توكل على الله .
البوري مش بياكل زي باقي السمك البوري فيه ناس بيقولو انه بيلحس الطعم وده طبعا مش صحيح لانه بياكل ولكن لان بقه فتحته لفوق وبقه صغير جدا فبيسحب من الطعم حتت صغيرة جدا وعلشان كده لما بياكل بنلاقي ان الفلة مش بتغمز
بنلاقي ان الفلة بتتحرك حركة بسيطة احنا بنقول انه بيخنق الفلة لما السمكة تاكل معاك اوعى ترد فيها جامد وده لسببين اولا لاننا قلنا ان اي حركة غريبة حتخلي السمكة تفزع وثانيا لان بق البوري ضعيف لو اديتة واحدة جامده شوية حتلاقي بقة بس هو اللي طالع .

2- صيد البوري بالربع (المشنقة)
شعر اساسي 25
شعر فروع 15 ل 20
الصيد بدون فلة
الشعر الاساسي طولة نص عمق المية
السلاح كبير شوية يعني 6 او 5
وبيكون عدد من 5 ل 7 سنانير بنعمل 3 طولهم حوالي 10 سم والباقي طولهم حوالي 5 سم , ونحط رصاص شريط حوالين مكان توصيل السنانير ,الصيد بيكون بعجينة ناشفة , بتحط العجينة على الرصاص وبتنزلها المية بالراحة لغاية ما اللبلوب بتاع البوصة يوصل اول المية في الطريقة دي البوري هو الي بيوقع نفسة وعلشان كده سموها المشنقة. وممكن نستخدم طعم تاني مع الطريقة دي وهو السردين تشيل راس السردينة وتفتحها من بطنها وتعلقها على السناير يعني تخلي السنانير كلها جوة بطن السردينة وتغرزها فيها من جوة .

صيد البوري بالبوصة والماكينة
الشعر الاساسي 40
شعر الفروع 30 او 35 وده لازم لان السمك اللي بيضرب عليك سمك تقيل
السلاح بيكون حوالي من 15 ل 25 سنارة نمرة 20 او ممكن 18
بنربط السنانير كلها طول واحد اللي هو حوالي 15 سم
وكلهم يتوصلو في الشعر الاساسي من نفس المكان اللي هو فوق الرصاصة بحوالي 30 سم
الطعم بيكون عيش بلدي اسمر
بنقطع الرغيف شرايط عرضها حوالي 5 سم وبنلفه على شكل اسطوانة بحيث يكون الجزء الداخلي للرغيف هو اللي برة , ونجيب استيك عادي من بتاع الفلوس ده ونثبت بيه العيش على الشعر الاساسي جنب وصلة الفروع ,ونجيب السنانير كلها ونغرزها في العيش بشكل عشوائي ونرمي ونسيبها , وان شاء الله حتلاقي البوصة دي بتعمل زلزال تعرف ان معاك بوراية لا تقل عن اتنين كيلو ونص او تلاتة كيلو .

طريقة تحضيرالعجينة لصيد البوري :-
اولا العجينة الطرية
كوب دقيق – مية حسب الاحتياج - سكر
حنحط الدقيق على النار ونقلبة لغاية ما يسمر ونضيف له معلقة سكر صغيرة مش مليانة وبعد كده نضيف المية شوية شوية لغاية ما تلاقي القوام بقى متماسك بيبقى قوامها عامل زي قوام الشحم اللي بنشحم بيه .
سيبها تبرد وحطها في علبة بس لازم لاحظ ان تطعيم العجينة الطرية عايز خبرة لانك لازم تطعمها بفمك بمعنى انك بتاخد حتة عجينة صغيرة فى فمك وتحط السنارة في فمك وتلف العجينة على السنارة بلسانك فالغلطة حتلاقي انك اصطدت نفسك .

ثانيا العجينة الناشفة

ودي بتكون للصيد بالربع وهي عبارة عن عيش بلدي عادي جدا وبنبلة ونعجنة بادينا ونسيبة جنبنا في الشمس او الهوا ولو احتاج مية تاني نديلة وده تطعيمة ساهل جدا لانك بتاخد حتة وتحط الرصاصة في نصها وتلف العجينة عليها بايدك زتاكد عليها زي ما تكون بتعمل كفتة .

لصيد البوري يجب ان تنفذ بعض الاجراءات وهى تحضير المرمى , وهو انك لازم تجمع السمكة الاول وده بيكون بالتزفير ,والتزفير بيكون بعيش مبلول في جردل مية لغاية ما يفرول وتعملة كور صغيرة وترمية في المية ,والتزفير للبوري شئ اساسي لان البوري بيتجمع على ريحة العيش في المية وكمان لازم تلاحظ ان مع كل سمكة تطلعها لازم ترميلك كورة او اتنين تزفر بيهم علشان تثبت السمكة تحت منك التزفير بيكون قبل ما تبتدي تصطاد بفترة ممكن توصل ساعتين او تلاتة ويكون متواصل علشان تقدر تجمع اكبر كمية من البوري .

كل شيئ عن سمكة"اللوت" وطرق صيدها

أضف إلى معلوماتك السمكيه
كل شيئ عن سمكة"اللوت" وطرق صيدها
:::::::::::::::::::::::::::::::::::::::::::::::::::::
أسماك اللوت
تنتشر أسماك اللوت فى جميع شواطئ البحر الأبيض المتوسط والشاطئ الغربى لقارة افريقيا ويمكن أن تصل الى طول 2 متر ووزن 50 كجم .

الوصف العام لأسماك اللوت:
الرأس كبير نسبياً مع جسم ممتد وطويل ، الفم بدون زوائد (barbils) العيون صغيرة والخط الجانبى واضح، الزعنفة الظهرية مقسومة الى زعنفتين الأولى أقصر من الثانية .
لون الجسم رمادى فضى مائل للبرونزى من أعلى الظهر والزعنفة القاعدية بنية اللون والفم له تجويف أصفر ذهبى يتحول الى اللون النى بعد الوفاة.

العادات البيولوجية لأسماك اللوت:
تنتشر أسماك اللوت فى جميع شواطئ البحر الأبيض المتوسط والشاطئ الغربى لقارة افريقيا وفى السنغال وخليج داكار ويمكن أن تصل الى طول 2 متر و 50 كجم.

تنمو أسماك اللوت بشكل جيد فى الصيف ولكن مع دخول الشتاء وانخفاض درجة الحرارة يقل نشاطها جدا حتى تصل درجة الحرارة الى 13-15 درجة مئوية.

أثناء شهر أبريل تتجه الامهات من عرض البحر الى الشواطئ لتتغذى جيدا فى هذا المناطق حيث يكثر الغذاء وذلك للتجهيز لموسم التبويض لديها وعندما تكون جاهزة تدخل فى مصبات الأنهار وذلك فى نهاية شهر مايو ، وخلال موسم التبويض تبدأ الذكور باخراج أصوات وذلك بتحريك عضلات البطن والمثانة الهوائية معا.

تبدأ الأمهات فى مغادرة مصبات الأنهار فى منتصف شهر يونيو ولكن تبقى قليلاً على طول السواحل لتتغذى فى المياه الضحلة الى أن يأتى الخريف ثم الشتاء وتبدأ فى التحرك باتجاه المناطق العميقة من المياه.

تعيش الزريعة فترة الحضانة فى مصبات الأنهار ومع نهاية الصيف تتجه الى المياه الساحلية بأعماق 20-40 متر لتمضية فترة صل الشتاء.

بدءاً من منتصف مايو تعود الأسماك الى مصبات لأنهار من جديد وتعاود الانتاج بنفس الطريقة.

ونلاحظ أن درجات حرارة الماء هى أهم عامل يحدد أوقات التغذية والانتاج لأسماك اللوت ولذلك نلاحظ أن أسماك اللوت تصل الى مصبات الأنهار فى شهر مايو وتغادر فى شهر أكتوبر عندما تبدأ درجات الحرارة فى الانخفاض.
طريقة الصيد
اللوت من الاسماك المحببة عندى فى الصيد جدا لانها بتوصل لاحجام كبيرة وبتتعامل مع السمكة لاننا بنشتغلها بشعر خفيف نسبيا مقاس40 او 45 للرمى لمسافات بعيدة والتعامل مع السمك الكبير بشعر خفيف فيه درجة صعوبة لان اى غلطة السمكة بتقطع الشعر

نيجى لموسم الصيد والادوات
الموسم شتوى وقليل فى الصيف السمكة ليلية وساعات بتعلم بالنهار

والمطلوب بوصة طويلة نسبيا حوالى 6 متر ماكينة قوية وسريعة وطبعا ما فيش احسن من الدايوا البى جى وخاصة موديل 90 شعر 40 ماركة تكون جيدة

فله (طفاحه متوسطه) والسنار مايقلش عن 5 ومايزيدش عن مقاس 1 وترمل بخيط 25 أو 30 فرده مقاس متر تقريباً والفرده التانيه مقاس 60 سم (تحت الرصاصه الحمصه طبعاً)

اساليب صيد مصريه (1)

اساليب صيد مصريه (1)
الخبط على الماء

::::::::::::::::::::::::::::::::::::
ضَرب أو غـَزغـَزه (جُبلي
تطفيش (بحر أحمر, وجه بحري)
كَركَبه (Karkaba) (السويس, منزله)
جووشه أو تطوييس (البرلس)
دُبـّاكه (Dobbaka) (أو) نـَطخ (Natkh) (فيوم)
تحجير (بدو سينا):ـ

كلها أسامي مختلفه لنفس الفكره, وهي التخبيط على وش الميه بقوه وبطريقه تعمل صوت وحركه تخلي السمك يتحرك ناحية الشبكه. عادة أداة التخبيط على الميه بتكون الـ[مِدره] (عصاية الصياد الطويله).

في البحر الأحمر, بدو سينا بيعومو بنفسهم في الميه عادة وهما لابسين [ماسك] (يعني نضارات ميه وفتحة تنفس) وبيبصو ع السمك تحت الميه, وبيضربو سطح الميه بإيديهم ورجليهم وهما بيعومو. الغـَزغـَزه مختلفه شويه عن الضرب فإن الصياد بينزل المِدره تحت الميه ويخبط بيها على أرض الميه عشان يطلع السمك المستخبي في الصخور او الخِنان.

في الفيوم, الفرق مابين المصطلحين هو إن الدُبـّاكه هي الخبط على الميه, والنـَطخ هو الخبط في المركب نفسها عشان تعمل صوت. الفيوميه بيستخدمو آلات موسيقيه (زي حاجه بيسموها الـ[فـَلَنكه]) مربوطه في تجويف الـ[أورِمه] في مقدمة الفلوكه, بتعمل صوت قوي, عشان تأثير الصوت على السمك يبقى أقوى

.. عن صيد القرموط

اضف الى معلوماتك النهريه
الكلام المضبوط .. عن صيد القرموط
:::::::::::::::::::::::::::::::::::::

القرموط سمكة صعبة في الصيد من حيث انها تأكل ببطء و بخفة و كمان انها سمكة شديدة و قوية في الصيد يعني بلغة الصيادين سمكة عفرة

هى سمكه مستطيله الجسم وزعانفها الظهريه تكاد تكون على طول الجسم اما الذيليه فمن فتحه الشرج الى الذيل والزعانف عموما تكون من شويكات لينه, الرائس منخفضه ( مبططه )وجزءه العلوي والسفلى عظمى صلب وله اربعه ازواج من الشوارب وعينه صغيره ,لون اجزائه العليا زيتى داكن وفيها علامات سوداء اما اجزاؤه السفلى فبيضاء وبه خط قاتم حول الجسم فى اسفل الرأس.

هذا النوع من السمك يستطيع العيش خارج المياه وهو يخرج الى اليابسه فى اثناء الليل او النهار وخاصه فى موسم التزاوج وهو يتغذى على الخضر والنباتات والاعشاب بالاضافه الى الديدان والاسماك الصغيره وقد وجد فى بعض امعاء بعض القراميط جرزان صغيره فهى على العموم تأكل اى شىء و ذلك من رحمة الله عز و جل بنا حيث انها تعتبر من مصادر النظافة الأولي في المياة العذبة وهى تصل الى احجام واوزان متوحشه وهناك نوع فى الوجه القبلى لا يختلف عن الوصف السابق الا في زعنفه الظهر حيث تنفسم الى قسمين.

أما عن طرق صيدها فهي كالتالي

يمكن صيد القراميط بالعجين ليلا لنفاذ الطعم وعيب الصيد بالعجينه فى الليل هو ان السمك بياكل على فترات متباعده ولكن حجم السمك كبير ولذلك لا تسطيع العجينه الصمود على السناره فترات طويله.

و غالبا ما يتم صيد القراميط بالعنب البناتي فالعنب البناتى يستهويها جدا و طريقة الصيد بالعنب البناتي سهلة يتم تثبيت سنارتين اسفل الرصاصه لان القرموط يتغذى من القاع على بعد 25 سم للسناره الاولى و50 سم للسناره الثانيه و ويتم ادخال 7 حبات عنب الى 10 حبات فىم نتصف العنبه بحرص مكونه شكل حبات السبحه ويكون العنب مغطى السن وبقية العنب مثبت فى بقية الخيط اعلى السناره وعند جذب السمكه للطعم لا يتم جذب البوصه سريعا حيث ان القرموط يخطف حبه او اثنين من العنب ويبتعد ثم يحوم مره اخرى حول نفس المكان مبتلعا للصناره وبقيه العنب.

لاستخدام العنب يستخدم شعر 40 على الماكينه وشعر 35 لترميل السنون والسن المناسب للعنب هو رقم 6 او 7 فرنساوى ويجب التعامل بصبر مع السمكه حيث انها سمكه قويه و يمكن ان تقطع الشعر.

و تأكل القراميط اي شئ كما ذكرنا سالفا فيمكن ايضا صيدها بمصارين الفراخ كطعم كما انهم في صعيد مصر يصنعو العجين بالطريقة التالية لصيدها و هي عمل عجين العيش البلدى وهو نىء و يتم اضافه الدماء اليه (دماء الذبائح طبعا ) ويعجن جيدا ويتم دفنه فى الارض فى مكان مشمس لمده من يومين الى ثلاثه ايام فتتخمر العجينه بالاضافه الى رائحه الدماء المتحلله فتعطى عجينه لها رائحه قويه جدا وتجذب القراميط من على بعد و كذلك يمكن اضافة مادة ذات رائحة نفاذة اسمها الحنتيت بعد اذابتها فى الماء و يتم شرائها من العطار الي العجين لإعطاء الرائحة المطلوبة.

أما اماكن الصيد و التواجد فهي كالتالي

القراميط تفضل المياه الهادئه وليس السريعه, ومن ضمن الاماكن التي تكثر بها القراميط جزيره فى قريه القرطيين وهى جزيره كبيره مزروعه موز والفلاحين بيرمو شجر الموز التالف فى المياه على الشاطىء فتكون بيئه جيده لاختباء القراميط تحتها

هذ الى جانب الاعداد الهائله لورد النيل المنتشره حول الجزيره والتى تعتبر بيئه ممتازه للقراميط اما جمصه فكميه اسماك القراميط فيها كبيرة جدا فهى عامله زي البلطى فى النيل و احسن شهور لصيدها هو شهر 7 و 8 و 9 , اما عن الصيد من تلك الجزيرة فستحتاج الى رمال السنارة 40 أو 50 على الأقل ويكون على المكنة خيط 50 على الأقل و السن يكون كبير

وذلك لأن السمكة اللى حتطلع مش أقل من 4 ك و الرمي يكون حداف او تشويح زي لغة الصيادين برضة و لازم يكون معاك جدالة أو شوكة علشان تطلع السمكة, اما طريقة الوصول لتلك الجزيرة فهي كالتالي تستطيع ان تأحذ ميكروباس من الكيت كات الى برطوس ثم تتمشى داخل البلد حتى تصل الى الشط فتأخذ معدية بنص جنيه الي الجزيرة وممكن تأجر مركب طول النهار الى المغرب بخمسةعشرة جنيها(ممكن تكون زادت دلوقت لأن الموضوع قديم ومنقول) وبتتأجر من عند ابوالحديد وهو بيأجر مراكب مش اكتر من ثلاثه صيادين حتى تستطيع الصيد مستريح.

تعليمات الصيد بالبوصه اليدوي

تعليمات الصيد بالبوصه اليدوي 

::::::::::::::::::::::::::::::::::::::::::
عملية الصيد بالبوصه اليدوي من أمتع عمليات الصيد واكثرها تعليما للصبر وهى تحتاج لتركيز عالى جدا إلا انك إذا جربتها واحببتها قد تصل بك الى حد الادمان ف عملية الصيد بالبوصه اليدوي سهله فى الحصول على مقوماتها و الحصول على مساعده فيها إلا أنه يبقي لك ان تجرب و تكرر العمليه و إليك بعض الخبرات العمليه فى الصيد بالبوصه اليدوى :

1- لو المياه ساكنه متريحش الشعر علي المياه ونتشه السمكه تكون عمودية وتحت الميه كده تعلق السمكه عدل.

2- لا تضع اي شيء في متناول كعب البوصة علشان سهوله الحركه ومنع الحوادث الرزلة.

3- لو الريح عالي ريح الشعر علي ا لمياه علشان الريح ميخدوش معاه ويعمل كرش واستخدم شعر خفيف.

4- ضع الطعم بعيد عن الشمس وابدا باحسن طعم واختم باحسن طعم متهملش.

5- لو المياه متحركه انتش مع اتجاه سحب السمكه للفلة.

6- لو التيار سريع استخدم شعر خفيف.

لابد أن تعرف اسماك البحر المتوسط وطريقة تعاملها مع الفله :

1- البطاطا : نقر مستمر وخفيف علي الفله مع تغييب خفيف للفلة تحت الماء والكبير منها بيغطسها مره واحده .

2- المرمار : سحبه عميقه مفاجأه .

3- الغلنفيش والميره : سحب الفلة علي سطح الماء للامام وتغريقها بسرعة .

4- البوري : تنميل بسيط جدا للفله وغطس خفيف .

5- الشرغوش الكبير والتيس : نقره قويه وسحب للفله للاعماق .

6- الجناشير او الشراغيش الصغيره : شد مستمر للفله وخطفها .

7- الكحله : خطف الفلة بعد نزول الطعم فورا .

8- القاروص سحب الفلة ببطأ تحت الماء وللامام.

7- إعرف كيف تتعامل مع السمكه الكبيره بالبوصه اليدوي

لو تصادف وعلقت معاك سمكة كبيرة وده نسبي طبعا اثناء الصيد بالبوصه اليدوي تعمل ايه؟؟؟؟؟

هنا افتكر الثقة في العدة لو انت متاكد من الشعر والسن وواثق فيهم حتتعامل بثقه وبدون خوف ان السمكه تقطع او تخلع يعني لو السمكه سرحت للامام علشان تمنعها تقطع الشعر عن طريق الشد تديها جنب البوصة يعني تخلي اللبلوب يقوس بالجنب وهنا حتوزع الشد علي مرونه اللبلوب والشعر وتموتها

لو السمكه سلمت وعاوز تطلعها وإنت في مكان عالي وممعكش ملقاف حتعمل الاتي حتبرم الشعر علي البوصه حتي تصبح نقطة تعليق الشعر عن العقله الثانيه وهنا ممكن ترفع واللبلوب مش حينكسر وده طبعا لو الشعر كويس .

امسح بعينك المكان تحتك لو فيه مكان ينفع تريح عليه السمكه ومتهربش ماشي مش لازم ترفعها لحد عندك . متحاولش ترفع السمكة من الشعر بايدك ابدا خصوصا لو السن صغير إمسك السمكه من المكان المناسب

وخد بالك
لو وقارة امسكها من عينيها او من الفم مش من النخشوش عشان حامى و بيدبح .
لو قاروصه من اسفل الرقبة او من الفم الصفائح الخيشوميه زي السكينه.
لو بطاطا من دماغها من الامام الشرغوش الكبير بيفتح شوك الظهر اول ما تمسكه

ومبروك عليك الصيد بالبوصه اليدوي
وبالهنا والشفا

اسماك البحر المتوسط وطرق صيدها معلومه ثريه .. عن هامور اسكندريه

اسماك البحر المتوسط وطرق صيدها
معلومه ثريه .. عن هامور اسكندريه
:::::::::::::::::::::::::::::::::::

(الوقار Dusky Grouper ) ويطلق عليه اسم هامور
الصغير منه يعتبر من مجموعة الحلابيش

أقصى حجم مسجل : 120 سم و أقصى وزن 25 كجم
البيئة الطبيعية : سمكة بحرية متوطنة في المحيط و البحر في المناطق المدارية بين خطي عرض 39 درجة شمالا و 16 درجة جنوبا و خطي طول 60 درجة شرقا و 17 درجة غربا على أعماق بين 20 و 200 متر.

الأهمية الإقتصادية : سمكة تجارية و هناك محاولات تجريبية للإستزراع السمكي لها لم تكتمل بعد و تعتبر سمكة هامة في رياضة صيد الأسماك , سعرها في الأسواق التجارية مرتفع جدا و يعتمد عليها إقتصاديا.

التكاثر : متوسطة القدرة و تحتاج لمضاعفة تعدادها ما بين 1.4 إلى 4.4 سنة

طبقا لتقارير لماكس تعتبر سمكة مهددة بدرجة متوسطة إلى عالية) مرجع : 59153 (

التوزيع الجغرافي : شرق الأطلنطي على طول الساحل الأفريقي الغربي حتى جنوب أنجولا متضمنة الشواطيء الجنوبية للبحر الأبيض المتوسط و توجد تقارير عن وجودها في جزر الكناري و الرأس الأخضر و لكنها غير مرجحة

يعرفها جيدا سكان السواحل المصرية على البحر الأبيض المتوسط و يقبلون على صيدها لا توجد في البحر الأحمر أو على الأقل لم يسجل صيدها من أي من الدول المطلة عليه و إن كان الهامور يشبهها إلا أنه فصيلة أخرى.

الشكل و المظهر : العدد الإجمالي للشوكات الظهرية 11 شوكة و عدد الإشعاعات الظهرية اللدنة 14 - 16 ، عدد الشوكات الشرجية 3 شوكات و عدد الإشعاعات الشرجية اللدنة 7 – 9.

يتعرف عليها أهل الإسكندرية بثلاثة خطوط متوازية مائلة على جانبي الرأس في منطقة غطاء الخيشوم و يسمونها وقار 111 حيث أن لونها متغير تبعا لعمر السمكة و المنطقة التي تعيش فيها فهي تتلون بلون البيئة المحيطة.

البيئة الطبيعية : الأسماك البالغة تتواجد في المناطق صخرية أو طينية أو رملية القاع , الصغار تم صيدها من البرك و المستنقعات و الأخوار و الخلجان الساحلية

في غرب المياه الأفريقية تشكل الأسماك 58 % من غذائها و الجوف معويات 21 % و السرطعانات 10 % و الرأس قدميات 10 % .

سمكة وحيدة الجنس أو خنثى تتحول للجنس الآخر عند الحاجة.
الهجرة الموسمية لفصائلها من شواطيء السنغال تتأثر بالمتغيرات المناخية و البيئية و تعداد الأسماك بشواطيء السنغال و موريتانيا و لكنها لا تلجأ للهجرة إلا في حالات قليلة و غير معروف تماما دوافعها
تستهلك طازجة أو مدخنة أحيانا وعليها إقبال كبير في غرب أفريقيا

تقويم السمكة في القائمة الحمراء : لم تقوم بعد
تعتبر سمكة غير ذي ضرر
مصنفة في عائلتي الجروبر و الراس

في مصر الإقبال عليها كبير و لكن الأعداد قليلة مما ادى إلى إرتفاع سعرها بطريقة خيالية و قد زاد في ذلك ظاهرة تهريب الأسماك في عرض البحر حيث يقبل عليها الأوربيون بدرجة كبيرة.

تباع طازجة كاملة أو مخلاة أو شرائح و هذا يسمح بغشها بأسماك أقل في القيمة السعرية مثل قشر البياض و أحيانا اللوت و لا يستطيع التفرقة بين هذه الفصائل و هي نيئة و مخلاة إلا بواسطة المستهلك الخبير أو بالمتمرسين في التفرقة بين مذاق الأسماك المختلفة و رائحتها عند الطهي و التذوق.

في بعض الحالات يخدع البائع المشتري و يبيع شرائح القرش المخلاة على انها وقار فعلى المصطافين الحذر و أفضل طريقة لمنع هذا أن يشتري المستهلك السمكة كاملة في حالة الأحجام الكبيرة.

يمكن التعرف على شرائح السمكة المخلاة بطريقتين:
الأولي بإتجاه الألياف العضلية الطولي المتشعب و ذلك بفرك طرف الشريحة فلا ينفصل الجزء المفروك عن الشريحة.

الثانية بشم أطراف الأصابع بعد الفرك فلا تجد لها رائحة.
تؤكل السمكة مشوية أو في صينية في الفرن مع الخضروات أو مقلية و هي طيبة المذاق أيا كانت طريقة طهيها.

تتواجد أحيانا طفيليات تعيش في الخياشيم و تظهر على هيئة نقط صفراء و بين العضلات على هيئة أكياس صغيرة سوداء أو فضية سوداء و هي لا تنقل أي من الأمراض للإنسان و لكن ينصح بطهي السمكة جيدا في أي من الأحوال.

طرق الصيد في الإسكندرية :
تصاد بالجر بالرابلات و الأسماك الصغيرة المسيخة أو المدلاة و الجر على الغاطس قرب القاع و السرعة بطيئة مع مراعاة تجنب التوعير بقدر الإمكان و يمكن إستخدام عوامة أو شبشب و التسقيط و فيه يستخدم الطعم الطبيعي و الحي

أفضل الطعوم النطاط الحي و الأسماك الصغيرة من الشراغيش و الميرمار الحي و الجرايات البندقة و أحيانا الثعابين الرملية الحية و البرغوت الطازج و العقر بدرجة أقل و شرائح الماكريل و السردين.
يحب صيدها هواة الصيد بالغطس

طريقة الصيد بالتسقيط :
السمكة لا تبلع مباشرة فهي تتلمس الطعم أولا و يقال بذيلها و تبتعد قليلا ثم تمسك الطعم أو تبتلعه و قد لايشعر الصياد سوى بسحبة بسيطة يطلق عليها إسم الشفطة و على الصياد الشكم بعدها و السحب بسرعة لا تسمح للسمكة باللجوء للصخر في أول مترين ثم التروي في السحب بعدها لأن السمكة ثقيلة و قد تقاتل بشراسة لو تم سحبها بسرعة كبيرة و أحيان تستعرض أو تفتح فمها مما يزيد المقاومة.

السنون لابد أن تكون مناسبة لحجم أسماك المنطقة و يفضل السنون طويلة الساق سواء بكرش أو كفتة و هناك من بفضل السنون المعقوفة للداخل و شخصيا لا أعرف السبب و في كل الحلات لابد من أن يكون معدنها جيد.

أماكن تواجدها بالإسكندرية :
أمام بوغاز الميناء الشرقي على بعد لا يزيد عن نصف كيلو بإمتداد غربي حتى المكس.

أمام شواطيء سيدي جابر و ستانلي على بعد لا يزيد عن كيلومتر
ظهر الأرمجان.

أمام شواطيء العصافرة المندرة و المنتزة على بعد حوالي 2 كيلومتر تقل في الشتاء.

حول الجزر الصخرية و إن تغير التوزيع بعد توسعة الكورنيش في الساحل الشمالي حول الصخرة في الكيلو 21 و أمام أبو تلات أمام المدخنة على بعد 5 كيلو متر.

في عجيبة في مرسى مطروح على بعد 3 كيلومتر و أيضا أمام معسكر السواحل في الأبيض و أحيانا من على الشاطيء لبعض المحظوظين حيث يسبق المرزبان الذي يشترك معها في التواجد في أكل الطعم.

تم صيد أحجام متوسطة من المعدية بعيدا عن مدخل البحيرة و مجرى القوارب و الرمي غربا و على أبعاد 30 متر على الأكثر.
كما تم صيد أحجام صغيرة من برديس في أبو قير في الليل بالترقيد والطعم حنشان حية.