السبت، 31 مايو 2014

طرق صيد سمك البطاطا وطريقه صنع عجينه الصيد....

سمك البطاطا

سمك البطاطا :
سمك البطاطا من أكثر الاسماك انتشارا فى الاسكندريه و برغم ضعف القشره الخارجيه له إلا أن له شوك ضهر قوي و مفتري إوعى ف يوم تجربه فإذا ما طالت أصابعك فستتألم بشكل فظيع واسألونى أنا عشان عرفت دا بالطريقه الصعبه لكنى حتى الأن أفضله كثيرا.... وهو سمك صاحب طعم مختلف لا يحبه الكثيرين
سمك البطاطا هو سمك عشبي يأكل الأعشاب البحريه و الطحالب لذلك تجده فى الوعر وبين الصخورو يشبه فى ذلك سمك الشراغيش
مواسم صيد البطاطا :
موسم صيد سمك البطاطا على ما اتذكر كان بيبدأ أول يوليو وحتى اخر شهر أغسطس بس من فتره صارت موجوده طول السنة بس طبعا بعد التوسعات العبقريه والاعمال الحفريه و الترميم حدث تلاعب فى مستعمراتها وبدأت أعدادها فى الإنخفاض فى أغلب الأماكن .
لكن يمكنك صيدها حاليا من بعض الأماكن و الموانىء القديمة التى لم تمس حتى الان كميناء ابوقير والدخيلة والمكس وايضا جزيرة نيلسون

موسم التفريخ بيكون في بداية ابريل وهي سمكة نهارية يعني مش موجوده بالليل واقصد انك تقدر تنزل عليها من مطلع الشمس الصبح حوالى 7 ص لحد قبل المغرب بساعه.

طرق صيد البطاطا :

سمك البطاطا لا يمكن صيده بالماكينه مع ان فيه ناس خدتها بالماكينه بس صدفه نادره جدا وأفضل طرق صيد سمك البطاطا هى بالبوصه اليد
البطاطا سمكه جلدها طري لكنها سمكه قويه جدا لكن موش بتحتاج وقت فى تعلم صيدها إذا قدرت تطلع 3 أو 4 سمكات ف خلاص انت كده عرفت طريقه غمزة السمكه و بتتعامل معاها إزاى ... بس عموما لازم تعرف انك لما تطلع بالسمكه من الميه تمسكها من خيشومها من الناحيه اللى مفيهاش شووك
فى سمك البطاطا بتظبط العيار على تلتين ارتفاع الميه يعنى لو العمق مثلا 3 متر يبقي العيار 2 متر ودا تقدر تظبطه مع اول كام رميه ، حد هيسألنى طب هى بتغمز إزاى ؟؟؟؟ بص يا ريس عندك حاجه من 2
أولا هتصطاد حساس يعنى من غير فله
يعنى بسبحه من 5 الى 8 سلاح وبنحط رصاصه نمره واحد فى أخر الشعر من تحت وطول السلاح من 8 الى 12 سم تقريبا وعموما دا بيكون تقديري يعنى موش بنقيسها بمسطره و بنستخدم الشعر الاساسي 25 أو 30 و الفروع 20 أو ممكن تستعمل فى الكل شعر 25 والسلاح ممكني يكون نمره 6 او 7 لكن الطريقه دى متعبه عشان بتحمل البوصه على إيدك عشان تحس بشدة السمكه فترد عليها بنتشه قويه وبسبب كده أغلب الصيادين موش بيفضلوها عشان مرهقه

ثانيا تصطاد بفله
وانا اعتقد انها الافضل لأن سمكة البطاطا قويه ف متتعبكش السمكه غير وانت بتطلعها
طبعا الشعر الاساسي 25 والفروع 20 أو 18 بس متزودش عن كده يفضل للمبتدئين 20 و بالنسبه للسلاح فيه حاجتين ممكن تستخدم السنار العادى نمره 20او 22 او 24 " سن الدبانه " ممكن تستعمل الشلاط بس تعمل القرمه صغيره (متزيدش عن 20 سم ) وانا شايف ان افضل مقاس للشلاط يكون 18 فرنساوي ..... حجم الفله حسب عينك بس المهم تظبط وزنها مع الثقل (الرصاص ) وستلاحظ عند صيد البطاطا ستجد الفله تنجذب للأسفل عدة مرات سريعه لذا عليك الانتظار حتى تغمر الفله فى القاع ثم إنتش و على بركة الله و ردك على السمكه على العاصي و فى اتجاه واحد على فوق واوعى تنتش تانى عشان لو عملت كده هتفلت منك السمكه وهتقع من السلاح
وبفكرك تانى فى سمك البطاطا بتظبط العيار على تلتين ارتفاع الميه يعنى لو العمق مثلا 3 متر يبقي العيار 2 متر ودا تقدر تظبطه مع اول كام رميه

الطعم المفضل :
اولا : العجين سواء عجينة دقيق او عيش أهم حاجه تكون عجينة ناشفة موش سايحه يعنى تكون ماسكه نفسها مع انها غير مفضله فى الاستخدام مع السلاح الحر سواء سنار او شلاط ( طرق صنع عجينة الصيد )
ثانيا : الجمبري( البرغوت ) مع البطاطا تقدر تزفر بعيش ( يعنى تبله لحد ما يفرول وتبتدي ترميه فى الميه على شكل كور بس تاخد بالك من إتجاه الريح و الميه ماشيه إزاى ) وتطعم بالبرغوت
ثالثا : الخضرة الشعر ( النسيله ) لازم الخضره تكون موجوده فى الميه لو نويت تصطاد بيها ومواعيدها بتكون من بدايات شهر 9 لحد أول او منتصف شهر 11 حسب درجة حرارة الميه عشان الميه لما بتسقع قوي بتحرق الخضره ف بتختفي واشهر وامهر ناس مشهورين بالصيد بالخضره هما أهل بحري وبالذات الصيد على الطابليته ..... وكمان من كام سنه كانت الخضره هى رقم واحد فى صيد سمك البطاطا
طبخ سمك البطاطا :
سمك البطاطا أحلى طرقه هو الشوي على الجريل ويمكن عمله مقلى مقفول أو مشوي بالزيت و الليمون او صينيه بس الاهم قبل كل دا غسل السمك جيدا وبالذات خيشومه وتقطيع شوكه الخارجي

وإن شاء الله ربنا هيكرمك .... بالتوفيق ان شاء الله
وبالهنا و الشفا

البطاطا

سمكة البطاطا وهي من اسماك البحر الاحمر والخليج وعبرت للبحر المتوسط من قناة السويس زمان على ما اتذكر ان الموسم بتاع البطاطا كان اول يوليو لغاية اخر اغسطس بس دلوقتي موجوده طول السنة موسم التفريخ بيكون في بداية ابريل وهي سمكة نهارية يعني مش موجوده بالليل .
الطعم المفضل
اولا : العجين سواء عجينة عيش او دقيق المهم انها تكون عجينة ناشفة .
ثانيا : الجمبري (البرغوت) .
ثالثا : الخضرة الشعر (النسيله ) .
طريقة الصيد
صيد البطاطا بيكون بالبوصة اليد مش الماكينة
فيه كذا طريقة لصيد البطاطا بالبوصة
اولا بالفلة او الغماز
الشعر الاساسي يكون نمرة 25 , والارمه بشعر 20 او 18 ومعروف عن البطاطا انها سمكة قوية وخصوصا الاحجام الكبيرة .
السلاح او السنارة نوعين
اما السنارة العادية وتكون نمرة 10 او 11 او 12
او الشلاليط وهي سلاح من 3 سنانير ملحومين في بعض زي الهلب , المهم الارمه تكون قصيرة يعني بالكتير 20 سم , الفلة صغيرة والرصاص او التقل خفيف
العيار (ارتفاع الفلة عن الرصاص ) يكون حوالي ثلثين ارتفاع المية عن الارض
مع الوقت وخبرتك في المكان حتعرف المية عمقها قد ايه
حط العجينة وارمي
اول ما الفلة تغمز نص غمزة الطشها وادعيلي
ثانيا الصيد من غير فلة (حساس)
وهو نوعين
طريقة اسمها الربع او المشنقة
وهي طريقة مش كل الناس بتقبل عليها لانها متعبة شوية
الشعر زي ما اتفقنا 25 , طول الشعر حوالي ثلثين عمق المية , يعني لو بترمي على قرار 3 متر يكون طول الشعر 2 متر , ويفضل استخدام بوصة قصيرة نوعا يعني 4 او 5 متر , السلاح مكون من 6 او 7 سنانير , كلهم نفس الطول اللي هو حوالي 5 سم تحت الرصاصة , ما عدا 2 منهم بيكون طولهم 10 سم , حجم السنانير يكون كبير مثلا نمرة 7 او 6 , الرصاص شريط وثقيل يعني لف ثلاث او اربع لفات كده , حط العجينة الناشفه على الرصاصة ونزلها المية حتلاقي السمك بتشدك ,الطريقة دي بنستخدمها للبوري برضة
الطريقة الثانية في الحساس هي السبحة
وسموها السبحة لان عدد السنانير بيكون كتير وفوق بعض زي شكل السبحة , ودي بيكون فيها طول الشعر زي طول البوصة , نحط رصاصة بلحة نمرة 1 في اخر الشعر من تحت , وفوق الرصاصة نربط من 4 ل 8 سنارة , الفروع طولها حوالي 10 سم , حط عجينة او جمبري ونزلها المية , حتلاقي السمك بتشدك برضه .
و احذروا من شوكه البطاطا مؤلمه جدا يعنى حاول تمسكها بقطعة قماش
دلوقتي نيجي لافضل اماكن تلاقي فيها البطاطا
حتلاقيها في البحر في اي مكان بس فيه اماكن مشهورة بالاسكندرية بالاحجام الكبيرة
السلسلة – كليوباترا – سيدي جابر – لسان جليم الثاني – سان ستيفانو – امام المحروسة – المنتزة – مارينا – جزيرة نيلسون
الوقار
او الهامور زى ما بيسموه فى الخليج هو من الأسماك المرغوبة جداً ، هو يتميز بلحمه الشهي والطري والدهني فهو غني بالأحماض الدهنية وأوميجا3 وهي أحماض غير مشبعة لها دور هام للمحافظة على صحة الإنسان ووقايته من الأمراض من بعض فوائد (أوميجا3) أنها تساعد في تكوين أنسجة المخ والقرنية والعين ، ولها تأثيرات مضادة للالتهابات ، وتخفف آلام المفاصل، وتقوي الذاكرة ، كما وتخفض من احتمال الإصابة بأمراض القلب.
و الغريب في الوقار أنه كلما كبر وزاد وزنه كان لحمه أفضل .. و اكبر حجم تم صيدة يزن 50 كيلو جرام .
وبالنسبة لبيئتها البحرية فإنها تنتشر في أنحاء الخليج والبحر الأحمر و البحر المتوسط ، وتعيش في الأماكن الضحلة القريب ة من السواحل ، وكذلك في الأماكن العميقة بين الشعاب المرجانية والصخور الضخمة ، وتبني بيوتها بمفردها من خلال حفر الرمل بين الصخور وأسفلها .
ويمكن اصطيادها بكل أساليب ووسائل الصيد المختلفة من تقليدية وحديثة ، فهي سهلة الصيد ، وهذا ما يفسر تواجدها المستمر في سوق السمك على مدار العام وليس لها موسم محدد ، ويساعد على ذلك كونها من الأسماك التي تنتج بيوضاً كثيرة تطفو فوق سطح الماء .. عند صيد سمك الوقار يراعى رفعة بسرعة لأن سمك يجيد الأختباء بين الصخور وكثير ما يُعتقد انه يدخل بين الصخور ينفخ جسمة حتي يتشبث بها وينقطع الخيط و الحقيقة ان الوقار يلف جسمة بين الصخور ويبدء في تحريك رأسة بها و بالتالى يحك الشعر في الصخور حتى يقطع.
ومن طرائف صيد الوقار أن هناك ظاهرة نادرة تقوم بها سمكة الوقار وهي أنها إذا ما أرادت أن تفرغ الغازات التي داخل جسمها فإنها تقوم بقلب نفسها على صفحة الماء فتكون في شبه غيبوبة، ويمكن في تلك الأثناء الإمساك بها بسهولة ، واصطيادها دون عناء
و على فكره اصطدت وقاره من حوالى 3 سنين من الطرح بنفس الطريقه و كان وزنها 16 كيلو
وهي سمكة قوية تتحمل الظروف البيئية القاسية : كارتفاع درجة حرارة المياه الضحلة ، أو البرودة الشديدة ، وعند تكدر صفاء ماء البحر، وقلة الأوكسجين ، وتبقى على قيد الحياة بعد اخرجها من الماء لمدة تصل إلى أكثر الساعة ، كما أنها سمكة لا تشبع من تناول الطعام ، إذ تتسع معدتها بأن تتناول نصف حجمها من الطعام